مراحب بكم
موضوعي اليوم عن فئه اشوف انها مظلومه في مجتمعنا
ممكن أكون غلطانة برأيي ..بس هذا اللي أشوفه
اليوم كنت بأحد المجمعات التجارية اشتري شوبه أشياء ناقصتني
وأنا طالعه من احد المحلات شفت منظر عور قلبي بشكل حتى نتكدت وطلعت للسياره على طول
إلا وهو مرور احد الشباب مصاب بأعاقه برجل .كانت مشيته ملفته للنظر ومعه طفله صغير أتوقع طفلته
المشكلة مو هنا..المشكلة بنظرات الناس له في الممر اللي إحنا فيه كلاً ترك اللي بيده وقام يناظر فيه
لو تشوفون وجه كيف صار هالشاب قطع قلبي قسم بالله باقي شوي و أروح اكلمه بس مدري وش بقوله
شي بخاطري ..كنت بقوله لايهمك احد خلك ماشي و واثق من نفسك ..مو أنت المعاق ..
الناس اللي موجودة هي المعاق تفكيره
والله وصفي لكم ماراح يجي نص الموقف اللي صار
الحمد لله على النعمة اللي إحنا فيها والله لايغير علينا
واشكر ربي ليل نهار إني بصحتي أقوم وأنام وأنا بكامل صحتي أنا وأهلي الله يخيلهم لي يارب
نفسي بس يمر أي شخص يحمل إعاقة لو بسيطة..وانه محد يلتفت له ويناظره بنظرات شفقه أو ازدراء
ياناس تذكروا انه بيد ربي الصحة والمال يروح
احمدوا ربيكم على النعم اللي إحنا فيها
المعاق إنسان مثله مثلنا..
المعاق إنسان له إحساس
المعاق إنسان له تفكيره الخاص
المعاق إنسان له طموحاته وأحلامه
مدري ليه إحنا نشوفهم فقط بالمظاهر..مو الجوهر
متى نفهم انه ربي ابتلاه من كثر حبه له
الرسول صلى الله عليه وسلم قال(إذا أحب الله عبدا ابتلاه)
يكفي انه نال حب ربنا
ترا والله اكتب هالموضوع ودمعتي تنزل من اللي شفته
وهذا الموقف زادني إصرار على العمل التطوعي اللي اغلب اللي حولي رافضينه
كنت مخيره بين العمل في جميعه الأطفال المعاقين او الجمعية الخيريه لرعاية الأيتام(إنسان)
وان شاءا لله إذا ربي قدرني راح أجرب العملين فيهم
وبس الين هنا مااقدر أكمل كتابه